هلوسات:ما تكلمنيش

ما تكلمنيش ، ما تواسينيش ، الغصة ركبت و وفات و كلامك ما يداوينيش 
ما تورينيش صدق كلامك و وعودك و غرامك 
ما حاجتيش 
ما تعملش على صبري ، صبري ما جاش 
هل مرة ما باش ، مابقاش و بلي نقول ما وفاش ، وفى مشى . طار فالهوا و مع حبار الستيلو هرب و ضاع 
كرهت احلامي الي تفكرني بيك و الحكاية الي في بالي نسجتها منك و بيك 
كرهت سكوتك و كرهت اللهجة و صوتك و كرهت استنيتي و صبري و الريح الي قصم ضهري و انا واقفة نستنى نميل في راسي نحلم و نتمنى 
الحلمة نصورها نزينها نركب الكلمة جرت الكلمة ، نكبرها و تولي حكاية و رواية و اسمع يالي ما تسمعش و شوف يالي ما تشوفش و افزع .. 
الساس ، خايخ طلع ، لا مني لا منك ، ملي جمعنا و ماحبش لا يلمني و لا يلمك 
الكلام بقى كلام و حتى حد ما يحب يعيش فل احلام ، الحلمة تكبر ، تصغر تبقى وهم ، قشة وسط البحر تشد فيها بيديك و ساقيك ، و تعرف روحك باقي تغرق و ما تسلمش للي يغلبك الموج و يبلعك 
ما تواسينيش ، ستانست نخبي الجرح عالجرح و نبرى ، و نقوم لا صار لا كان ، صغير اخر و طيحناه و كملنا ، خلصنا و لا تعارفنا و لا تعاهدنا 
و حتى السماح ، ما تسامحنا 
شكون تحبني نسامح ؟ سعدي و وعدي و الطحانة الي علينا تلمت ، لا كلت لا ملت .. 
نوارة و ذبلت . ما تكلمنيش امشي كاينك ما تعرفنيش ، انساني و ننساك 
لا صار و لا كان . الارض الي ماتنبت ، عمرها ما تولي جنان. 
زايد ، وعدي و وعدك و كبان سعدك . برا.. انسى هاك التبسيمة و البوسة و التعنيقة و برا .. لاني ليك ولاك ليا امشي 
بدل رب الثنية 
و كي تشوفني متعدية ، متكلمنيش ، يزي ما غريت بيك و غريت بيا
ملاحظة : اي تشابه مع الاحداث لا يمت للواقع بصلة كلام جا هكا و برا