Point lecture n°3 : everything everything de nicola yoon
" Tout est risqué. Même ne rien faire , c'est risqué ; c'est a toi de décider "
*ma lecture commune avec Emna , houayda , hadiya, mariem , chaima et yasmine . 💙
----------
في خضم العالم المزعج و المعقد هذا ، كتاب كيما هذا بسيط جدا ، بقضايا صغيرة و بسيطة ، افتتحت شهر جويلية .
الكتاب صدر السنا ، للكاتبة Nicola YOON
و خرج فيلم زادا بنفس الاسم اخرجتو Stella MEGHIE و دخل السنا في ال box office متاع امريكيا لمدة قصيرة
نلقاوه زادا يتعرض في قاعات السينما التونسية في تونس و في سوسة ( منعرش اسم البلاصة بالضبط )
الكتاب صدر بالأنڨليزية و النسخة الي قريتها و الموجودة هي بالفرنسية
فرنساويتو باهية مفهومة ساهلة
غلاف لكتاب حاجة محلاها و ملكتب الي يستاهلو يتزينو منكثر ما في غلافو الوان و فرحة
المهم ،
الحكاية متاع لكتاب على بنية ، عاشت 18 سنا منغير ما خرجت من دارهم .. C'est choquant .
اي الطفلة هذي مريضة بمرض نادر يخليها تنجم تموت مع اي contact مع الناس و الهواء خاصة ..
عدات حياتها في دارهم ، في بيت بيضاء و فيها برشا كتب و هواء مصفي ..
الطفلة هذي نهار اطل مالشباك تلقى ناس جدد جايين يسكنو جنبهم ، جلب انتباها وليد ... الطفل الي باش تحبو فيما بعد رغم المعيقات الكل و يحبها .. و الي باش تبدا تكتشف معاه حياتها و معنى الدنيا . برشا حاجات و برشا احداث و برشا صدمات
الحكاية هوليودية بامتياز ، انجذاب بين مراهقين يتحول فيما بعد لحب و صعوبات .. الانسان في مواجهة القدر و الطبيعة .
يمكن الي يقرا الريفيو هذا باش يقول انو كتاب تافه و يمكن كان انا سمعت بيه هاكا منقراهش ..
Les points fortes de livre :
•الكتاب هذا ، ركز على جزئية يمكن نحنا منركزوش فيها بحكم نمط حياتنا السريع ، أما تخيل لوكان جا محكوم عليك تعيش في حكة صغيرة ، زوز ميترو على زوز ميترو .. تخيل لوكان تولدت محبوس و مسكر عليك
حياتك باش تكون كيما هيا تو ؟
باش تحب الي تحب فيه تو و تكره الي تكره فيه تو ؟
باش تضحي بروحك مقابل الحرية ؟
لوين تنجم يوصل طوقك للحرية و التحرر من سجن تفرض عليك
• الأحداث في الكتاب : الكتاب خفيف ، رغم انو طويل شويا و كان ينجم يكون مختصر اكثر
اما الاحداث فالكتاب ، رغم انها ساعات تكون مش مخدومة مليح ، الا انها كفيلة باش تشدك و تجبرك تكملو فيسع
تولي عنصر فالدار بسرعة و تشوف فالشخصيات تتحرك قدامك و تتماها معاهم
• العقدة وسط لكتاب : كيفاش ؟ و علاش باش تسألهم لروحك برشا
•النهاية ، ولا خلي نقولو كي تتكشف الاوراق لكل ، حاجة متجيش لبالك بالكل ..
Les points faibles de livre :
•تنظيم الكتاب : متنجمش تصنفو هو شنو ، رواية ، مذكرات ، autobiographie شنو بالضبط ؟
صفحات مكتوبة برشا ، صفحات فيها سطر واحد ، صفحات فيهم تصاور و رسوم بيانية و جداول و des fichiers
•الزمن الي ساعات يزرب اكثر ماللازم و ساعات يطيح و يطيح معاه ال rythme
• النهاية ... النهاية الي كان لازم تقص فال 227 / 229 كأقصى تقدير
الجزء الي من 228 ل 256 ، زايد و فسد الكتاب و كل شي ..
.............
Conclusion :
كتاب محلاه يخليك تعاود تشوف الحاجات من زاوية جديدة ، خفيف ، ممتع ، ما يبكيش و ميحممش القلب برشا ، تنجم بسهولة تتخيلو فيلم
تقييمي الاولي كان خمس نجوم
⭐⭐⭐⭐ اربعة نجمات تقييم بعد ما استوعبت الكتاب ..
Le lien de téléchargement 👈👈👈
Bonne lecture 💙📖
