Point de lecture n°5: Ta vie commence quand tu comprends que tu n'en qu'une de Raphaëlle Giordano

احيانا العناوين خداعة ..
عنوان طويل و عريض لكتاب تتخيل انو ياسر مزيان ، بعد تطلع غالط ..
لكتاب ل Raphaëlle Giordano , فيه 152 صفحة ، قريتو بالفرنسية و منعرفش اذا موجود بلغات أخرى
المهم
حكاية مرا تعمل حادث صغير في ليلة مالليالي ، يعاونها راجل و يهزها لدارو و غاد هو و مرتو يعاونوها باش ترجع لدار ، بالصدفة تكتشف انها عندها une routine aiguë ..
ترجع لدارها ، تقرر فيما بعد انها تتصل ب Claude السيد الي عاونها و الي هو un routinologue باش يعاونها تبرا
و تبدا منغاد الحكاية ..
الموضوع متاع الكتاب ، كموضوع ، محلاه ، بكلنا عايشين و غاطسين للعنكوش فالروتين و الي مخلينا ساعات منجموش نفرحو من قلوبنا ولا نقدرو الحاجات الي عندنا ..
اما طريقة الصياغة و ترويج الفكرة كان اقرب لطريقة نكرها برشا ، طريقة جماعة التنمية البشرية ، الي يبيعو فالريح للمراكب بالنسبة ليلي ..
عطى فل كتاب حاجات لازم تعملهم باش توازن بين الجسد و النفس و تتخلص مالروتين كيما الرياضة و انك تكون اجتماعي و الحب و برشا حاجات اخرى
كتاب صغير و قصير فالحجم ، انا عن نفسي تقلقت منو في برشا مقاطع و كرهت برشا مقاطع و عديت اكثر من شطرو مقريتوش لسبب واحد انو منعتبرش فما وصفة لسعادة .
اما كانك من هواة التنمية البشرية ، هذي رواية مقنعة 😂 تنجم تسعدك برشا و تبدلك حياتك كيما يقولو هوما ...
المهم ⭐ نجمة على الموضوع و الغلاف ..
Bonne lecture 📖😀