Point lecture n°17 : رجل في الظلام لبول اوستر
رواية رجل في الظلام لبول اوستر Auster Paul
ترجمة أحمد م. أحمد
أول رواية أمريكية قريتها
رواية كي تبداها ، تحس انها رواية عادية ،
ناقد كتب متقاعد ،مريض ، يعيش مع بنتو مريام و بنتها كاتيا ، كل حد فيهم عندو حكاية ،
حكاية الشخصيات الثلاثة هذم هوما حكايات ثانوية
هذي النقطة تكتشفها بعد عشر صفحات مالرواية ، القصة الأساسية هي القصة إلي بصدد كتابتها الناقد المتقاعد بطل الرواية ، الي يتخيل فيها أحداث مغايرة ، ماذا لو انو أحداث 11 سبتمبر لم تقع و أنو الحرب على العراق زادا مصارتش ، ماذا لو انو الحرب هي حرب أهلية في الولايات المتحدة الأمريكية و أنو هو المسؤول -نوعا ما - عن قيام هذي الحرب و من هوني تبدا حكاية جديدة ...
*****
المميز في هذي الرواية و الي جذبني شخصيا، انو الكاتب طوع نظرية فيزيائية لخدمة أحداث روايتو ، هي نظرية العوالم المتوازية إلي تقول بطريقة مبسطة انو العالم متكون من عدة عوالم متوازية ، و اي فعل في عالمنا ينعكس على العوالم الأخرى و انو اي فعل ، او حتى اللافعل ، تنجم تكون عندو نتائج مختلفة في عوالم أخرى ، و قالو الفيزيائين الي اهتمو بهالنظرية العجيبة انو الحروب من خلال هذي النظرية ستكون لديها نهايات مختلفة و سيناريوات متعددة .
و انا شخصيا دفعتني الرواية باش نحاول نفهم النظرية هذي رغم الي هي مش مجالي جملة
*****
بالنسبة لتقييمي ليها 3/5 ،
* قدمتلي معلومة جديدة
*فيها اقتباسات مزيانة
* الترجمة باهية
السلبي فيها هو الكم الهائل من العبارات النابية إلي معندهاش مبرر
******
مصدر الكتاب : الي تحمس لرواية ينجم يلقاها في المكتبة العمومية بصفاقس ، النسخة الالكترونية منعرفش اذا متوفرة ولا
******
تنويه : المنشور بالدارجة
